1Ch 5 | ZomZIV | STEP | Israel ta upa pen Reuben tapate hi-a (amah ta upa hi napi a pa zineih-lupnapi ninsak ahi manin a ta upa za Israel tapa Joseph tungah kipia hi; tua ahi ciangin khangthu ciamtehna ah tapa upapen za tawh kizui-in kigual thei lo a;

1 Chronicles 5

Reuben

1 Israel ta upa pen Reuben tapate hi-a (amah ta upa hi napi a pa zineih-lupnapi ninsak ahi manin a ta upa za Israel tapa Joseph tungah kipia hi; tua ahi ciangin khangthu ciamtehna ah tapa upapen za tawh kizui-in kigual thei lo a; 2 a sanggamte lakah Judah thahatpenin amah panin gam uk khat piangkhia ahi manin tapa upa za Joseph in a ngah hi)— 3 Israel ta upa Reuben tapate: ^a

Hanoch, Pallu, Hezron, le Carmi. ^b
4 Joel suante:
Ama tapa Shemaiah, a tapa Gog,
a tapa Shimei, 5 a tapa Micah,
a tapa Reaiah, a tapa Baal,
6 le Assyria Kumpipa Tiglath-Pileser ^{▼▼5.6 Hebrew in Tilgath-pilneser, Tiglath pileser tawh kilamdang lo tg. 26 ah zong} in sal-a a kaih Beerah. Beerah in Reuben-te makaipa ahi hi. ^d
7 Amau khang ciamtehna tawh kizui-in amau kinaipih a bawng’bawng’ a kigual ahi hi: ^e
Ukpi Jeiel, Zechariah, 8 le Joel tapa Shema tapa Azaz tapa Bela. Amaute Aroer panin Nebo, le Baal Meon dongah lal uh hi. 9 Nisuahna-lam pangah Euphrates gunpi gei sehnel-gam mong dong a luah uh hi, bang hang hiam cih leh a ganhonte uh Gilead ah pung mahmah hi.
10 Saul uk hun lai-in amaute in Hagri-te simin amau khutin zo uh a; Hagri-te tenna Gilead nisuahna lam kual khempeuh ah a teng uh hi. ^f

Gad

11 Amau zomah Salecah dongin Bashan ah Gad-te a teng uh hi: ^g
12 Joel ukpi hi-a Shapham a nihna hi-in, tua ciangin Bashan ah Janai le Shaphat ahi hi.
13 Amau kitanaupih innkuante:
Michael, Meshullum, Sheba, Jorai, Jacan, Zia le Eber - a vekin sagih ahi hi.
14 Hihte in Buz tapa, Jahdo tapa, Jeshishai tapa Michael tapa Gilead tapa Jaroah tapa, Huri tapa Abihail tapate ahi hi.
15 Guni tapa, Abdiel tapa Ahi in amau innkuan lutang ahi hi.
16 Gad-te Gilead, Bashan le khua pua-a om khuaneute le Sharon lonona gam khempeuh amau tunzawhna ciangciang ah a teng uh hi.

17 Hihte khempeuh Judah kumpipa Jotham le Israel kumpipa Jeroboam in a uk hun lai-a khangthu ciamteh-na-a kikhum ahi hi.

18 Reuben-te Gad-te le Manasseh beh alangte in galkuan thei ding mi - lum le namsau tawi thei, thal zang thei, galsim dinga kisinsaksa pasal 44,760 a nei uh hi. 19 Amaute in Hagri-te, Jetur, Naphish le Nodad a sim uh hi. 20 Amaute sim dingin huhna ngah uh a, Hagri-te le amau kipawlpihte khempeuh amau tungah Pasian in a pia hi, bang hang hiam cih leh galsim laitakin amaute in ama tungah a ko uh hi. Amaute in amah muang uh ahi manin a thungetna uh a dawng hi. 21 Amaute in Hagri-te ganhonte - kala-oh tul sawmnga, tuu tul zanih le tul sawmnga le laa tul nih a matsak uh hi. Amaute in galmatin mi tul zakhat man uh a, 22 adang tampi a si hi, bang hang hiam cih leh amau’ galdona Pasian aa ahi hi. Tuateh amaute sal-a a kikaih hun dong tua gam a tang uh hi. ^h

Manasseh Beh - Langte

23 Manasseh mi beh alangte tam lua mahmah uh a; amaute Bashan panin Baal Hermon, tua pen Senir (Hermon Vum) dongah a teng uh hi. ⁱ

24 Hihte, amau innkuan lutangte ahi uh hi: Epher, Ishi, Eliel, Azriel, Jeremiah, Hodaviah le Jahdiel. Amaute galhang, mi minthang le amau innkuan lutangte ahi uh hi. 25 Ahi hangin amaute a pate uh Pasian tungah muanhuai lo uh a, amaute mai-a Pasian in a suksiat tua gama teng mite’ pasiante tungah a kizuak uh hi. 26 Tua ciangin Israel Pasian in Assyria kumpipa Pul (tua pen Assyria kumpipa Tiglath-Pileser) Reuben-te, Gad-te le Manasseh beh alangte sal-a kaipa a hansuah hi. Amah in amaute Halah, Habor, Hara le Gozan gunah paipiha amaute tuni dong tua lai-ah a om uh hi.